મહીસાગરના થાણાસાવલીમાં શિક્ષણલક્ષી સેમિનાર ગૂંજ્યો: નાયબ કલેક્ટર એચ.ટી. મકવાણાએ વિદ્યાર્થીઓને આપ્યો વ્યસનમુક્તિ અને મૂલ્યનિષ્ઠ શિક્ષણનો પ્રેરણાદાયી સંદેશ

અહેવાલ તસવીર

વિજય જોશી,મહીસાગર

મહીસાગર જિલ્લાના કોઠંબા તાલુકા સ્થિત થાણાસાવલી ગામે શિક્ષણ, સંસ્કાર અને સામાજિક જાગૃતિનો અનોખો સંગમ જોવા મળ્યો હતો. ૨ નવેમ્બરના રોજ યોજાયેલા ભવ્ય શિક્ષણલક્ષી સેમિનાર અને માર્ગદર્શન કાર્યક્રમમાં નાયબ કલેક્ટર એચ.ટી. મકવાણાએ અધ્યક્ષસ્થાનેથી ઉપસ્થિત રહી વિદ્યાર્થીઓ અને ગ્રામજનોને જીવન ઘડતરનું પ્રેરણાદાયી માર્ગદર્શન પૂરું પાડ્યું હતું.
શિક્ષણ માત્ર ડિગ્રી કે માર્ક્સ પૂરતું સીમિત નથી
સભાને સંબોધતા નાયબ કલેક્ટર એચ.ટી. મકવાણાએ જણાવ્યું હતું કે, સાચું શિક્ષણ એ માત્ર પુસ્તકીય જ્ઞાન કે પરીક્ષામાં સારા ગુણ મેળવવાનું સાધન નથી, પરંતુ તે વિચારશક્તિ, આત્મવિશ્વાસ, નૈતિક મૂલ્યો અને સામાજિક જવાબદારી કેળવવાનું પ્રબળ માધ્યમ છે. શિક્ષણ વ્યક્તિને શિક્ષિતની સાથે સંસ્કારી, આત્મનિર્ભર અને જાગૃત નાગરિક બનાવે છે, જેનાથી સમાજમાં પ્રવર્તતી અંધશ્રદ્ધા, અજ્ઞાનતા અને કુરિવાજો જેવી બદીઓ સામે સકારાત્મક બદલાવ લાવી શકાય છે.
યુવાધન વ્યસનોથી દૂર રહે: રચનાત્મક કાર્યોમાં શક્તિ લગાવો
યુવાનોને સીધો અનુરોધ કરતાં તેમણે તમાકુ, દારૂ અને નશીલા પદાર્થો જેવા ઘાતક વ્યસનોથી દૂર રહેવા કડક આહ્વાન કર્યું હતું. તેમણે ભારપૂર્વક જણાવ્યું કે વ્યસન પરિવાર અને ભવિષ્ય બંનેને બરબાદ કરે છે. યુવાનોએ પોતાની ઉર્જા અને સમયનો ઉપયોગ શિક્ષણ, કૌશલ્ય વિકાસ, રમતગમત અને સમાજસેવા જેવા કાર્યોમાં કરવો જોઈએ.
દીકરીઓના શિક્ષણ અને સમાનતા પર વિશેષ ભાર
કાર્યક્રમમાં તેમણે દીકરીઓના શિક્ષણને પ્રોત્સાહન આપવા, મહિલાઓનું સન્માન જાળવવા અને દરેક બાળકને શિક્ષણની સમાન તકો મળે તે માટે સામૂહિક પ્રયાસો કરવા હાકલ કરી હતી. બાળકોના ઉજ્જવળ ભવિષ્ય માટે પરિવાર, શિક્ષકો અને ગ્રામજનોએ સહિયારી જવાબદારી નિભાવી નિયમિત શાળા પ્રવેશ અને હાજરી સુનિશ્ચિત કરવા ગ્રામજનોને અનુરોધ કર્યો હતો.
આ કાર્યક્રમમાં ગામના આગેવાનો, સરપંચ, વડીલો, મોટી સંખ્યામાં મહિલાઓ, શિક્ષણવિદો અને વિદ્યાર્થીઓએ ઉત્સાહભેર ભાગ લીધો હતો. સમગ્ર આયોજન થકી શિક્ષિત સમાજ, વ્યસનમુક્ત યુવા પેઢી અને સામાજિક બદીઓથી મુક્ત ગામના નિર્માણનો મજબૂત સંકલ્પ લેવાયો હતો.