By ૫૩ વર્ષ પહેલાં અવસાન પામેલા ખેડૂત ૨૦૨૫માં રજીસ્ટ્રાર કચેરીએ ‘જીવતા’ થયાની આશંકા સાથે કિસ્સો પ્રકાશમાં આવ્યો !
૧.૫૦ કરોડની કિંમતી જમીન હડપવા માટે ખેલાયો હોવાની આશંકા
ભેજાબાજ ભૂમાફિયાઓએ મૃતકને બદલે અન્ય ઇસમને ઊભો કરી ખેલ પાડ્યો હોવાની ચર્ચા
બાયડ
અરવલ્લી જિલ્લાના મહેસૂલી તંત્રમાં ભૂકંપ લાવી દે તેવું એક કથિત ‘મૃત્યુંજય’ કૌભાંડ પ્રકાશમાં આવતા સનસનાટી મચી ગઈ છે. બાયડ તાલુકાના એક ગામમાં જમીન માફિયાઓએ કાયદાના લીરેલીરા ઉડાડી, વર્ષ ૧૯૭૨માં મૃત્યુ પામેલા એક ખેડૂતને ૨૦૨૫માં ‘જીવતો’ દર્શાવી કરોડોની જમીનનો સોદો પાડી દીધો હોવાની પ્રબળ શંકા કુશંકાઓ સેવાઈ રહી છે.
બનાવટી આધારકાર્ડ અને પાવર ઓફ એટર્નીનો ખેલ હોવાની ચર્ચાઓ
સૂત્રો પાસેથી મળતી પ્રાથમિક વિગતો મુજબ, બજારમાં અંદાજે ૧.૫૦ કરોડની કિંમત ધરાવતી ૯ વીઘા જેટલી કિંમતી જમીન પચાવી પાડવા માટે ભૂમાફિયાઓએ માસ્ટર પ્લાન ઘડ્યો હતો. જેમાં વર્ષ ૧૯૭૨માં અવસાન પામેલા મૂળ માલિકના નામે કથિત રીતે બનાવટી આધારકાર્ડ તૈયાર કરવામાં આવ્યું હોવાનું મનાય છે. આ બનાવટી દસ્તાવેજોના આધારે રજીસ્ટ્રાર કચેરીમાં પાવર ઓફ એટર્ની (POA) રજીસ્ટર કરાવી લેવામાં આવી હોવાની વિગતો ચર્ચાના ચકડોળે ચઢી છે.
બાયોમેટ્રિક્સ અને લાઈવ ફોટો સિસ્ટમ સામે શંકાના સવાલો
સરકારી નિયમ મુજબ રજીસ્ટ્રાર કચેરીમાં દસ્તાવેજ વખતે વ્યક્તિનો લાઈવ ફોટો અને અંગૂઠાના નિશાન લેવા ફરજિયાત છે. ત્યારે પ્રશ્ન એ ઊભો થાય છે કે જો મૂળ માલિક દાયકાઓ પહેલાં મૃત્યુ પામ્યા હોય, તો ૨૦૨૫માં કચેરીમાં કોના અંગૂઠાના નિશાન લેવાયા? શું કોઈ હમશકલ ઊભો કરવામાં આવ્યો હતો? આ સમગ્ર પ્રક્રિયામાં જવાબદાર તંત્રની મિલીભગત છે કે કેમ તે તપાસનો વિષય છે.
દલાલો વચ્ચે ‘મલાઈ’ની વહેંચણીમાં ડખો થતા ભાંડો ફૂટ્યો કે બીજું જ કંઈ !!
લોકમુખે થતી ચર્ચાઓ મુજબ, આ સોદામાં મળેલા લાખો રૂપિયાના કમિશનની વહેંચણીમાં દલાલો અને વચેટીયાઓ વચ્ચે આંતરિક જૂથવાદ સર્જાયો હતો. આ ખેંચતાણને કારણે જ આ ગુપ્ત ખેલ ‘છાપરે ચઢીને પોકાર્યો’ હોય તેમ સમગ્ર પંથકમાં તેની વિગતો વહેતી થઈ છે.
વારસદારો અને વર્ષોથી વાવણી કરતા ખેડૂતો પણ અજાણ હોવાનું અંગત સૂત્રો દ્વારા માહિતી
જમીનના મૂળ વારસદારો પિતૃક જમીનથી અજાણ હોવાનો લાભ લઈને આ ખેલ પાડવામાં આવ્યો હોવાનું જણાય છે. હાલમાં આ મામલે કોઈ સત્તાવાર પોલીસ ફરિયાદ નોંધાઈ નથી, પરંતુ જે રીતે વિગતો બહાર આવી રહી છે તે જોતા જો ઉચ્ચ સ્તરીય તપાસ થાય તો મોટું રેકેટ બહાર આવી શકે છે.
