કપડવંજનું સાલોડ ગામ ચાંદીપુરા વાયરસનો શંકાસ્પદ કેસ સામે આવ્યો ? એક વર્ષનું બાળક હોસ્પિટલમાં દાખલ થતાં આરોગ્ય તંત્ર દોડતું થયું

હરીશ જોશી, કપડવંજ

કપડવંજ તાલુકાના સાલોડ ગામે એક વર્ષના માસૂમ બાળકને ચાંદીપુરા (ચાંદીપુરમ) વાયરસનો શંકાસ્પદ ચેપી રોગ થયો હોવાની પ્રાથમિક વિગતો બહાર આવતા સમગ્ર ખેડા જિલ્લા સહિત તાલુકાનું આરોગ્ય તંત્ર સફાળું જાગી ગયું છે. બાળકની તબિયત લથડતા તેને તાત્કાલિક હોસ્પિટલમાં દાખલ કરવામાં આવ્યું છે, જ્યાં નિષ્ણાત તબીબોની દેખરેખ હેઠળ તેની સઘન સારવાર ચાલી રહી છે.
સદનસીબે, અસરગ્રસ્ત બાળકનું કુટુંબ ગામના મુખ્ય રહેણાંક વિસ્તારથી દૂર એક સીમના ખેતરમાં વસવાટ કરતું હોવાથી, આ ચેપી રોગ સ્થાનિક અન્ય લોકોમાં ફેલાવવાની સંભાવના ખૂબ જ ઓછી હોવાનું પ્રાથમિક દ્રષ્ટિએ માનવામાં આવી રહ્યું છે.

આરોગ્ય વિભાગ દ્વારા લેવાયેલા તાકીદના પગલાં:

• ઉચ્ચસ્તરીય તપાસ: જિલ્લા મુખ્ય આરોગ્ય અધિકારીની ટીમ તાત્કાલિક સાલોડ ગામે દોડી ગઈ છે અને બાળકના સેમ્પલ લઈ લેબોરેટરીમાં મોકલવાની તજવીજ હાથ ધરી છે.
• જંતુનાશક દવાઓનો છંટકાવ: આ રોગ સેન્ડફ્લાય (રેતીની માખી) દ્વારા ફેલાતો હોવાથી, તંત્ર દ્વારા ગામ અને ખેતરની આસપાસ ફોગિંગ તેમજ મેલાથિયોન પાવડરનો છંટકાવ શરૂ કરાયો છે.
• સર્વેલન્સ કામગીરી: રોગનો ફેલાવો અન્યત્ર ન થાય તે માટે આસપાસના વિસ્તારમાં સઘન મેડિકલ સર્વે હાથ ધરીને ગ્રામજનોને સાવચેતી રાખવા અપીલ કરવામાં આવી છે.